पंढरपूर : येथील श्री विठ्ठल रुक्मिणी मंदिर देवस्थान समितीच्या अध्यक्षपदाचा कार्यभार डॉ. अतुल भोसले यांनी नुकताच स्वीकारला. या वेळी त्यांनी मंदिर समितीच्या अधिकाऱ्यांकडून कामकाजाची माहिती घेतली. तसेच देवस्थानतर्फे उभारण्यात येत असलेल्या भक्त निवासाच्या कामाची पाहणी करून ते लवकरात लवकर पूर्ण करण्याचे निर्देश दिले.
महाराष्ट्राचे आराध्य दैवत असणाऱ्या श्री क्षेत्र पंढरपूर येथील श्री विठ्ठल रुक्मिणी मंदिर देवस्थान समितीच्या अध्यक्षपदी भारतीय जनता पक्षाचे प्रदेश चिटणीस डॉ. अतुल भोसले यांची निवड झाल्याचे राजपत्राद्वारे सांगण्यात आले होते. राज्य सरकारने आषाढी एकादशीच्या पूर्वसंध्येला म्हणजेच तीन जुलै रोजी राजपत्र प्रसारित केले होते. एकादशीच्या मुहूर्तावर डॉ. अतुल भोसले यांनी पंढरपूर येथे श्री विठ्ठल-रुक्मिणीचे दर्शन घेऊन आपल्या पदाचा कार्यभार स्वीकारला. मंदिर समितीचे मुख्य कार्यकारी अधिकारी तथा पंढरपूरचे प्रांतधिकारी डॉ. विजय देशमुख यांनी नतून अध्यक्षांचे स्वागत केले. या वेळी देवस्थान समितीचे सदस्य संभाजी शिंदे, व्यवस्थापक तथा नायब तहसीलदार विलास महाजन, लेखाधिकारी रवींद्र वाळुंजकर, कृष्णा कारखान्याचे संचालक जगदीश जगताप, कृष्णा कामगार सोसायटीचे चेअरमन पैलवान आनंदराव मोहिते आदी मान्यवर उपस्थित होते.
यानंतर देवस्थान समितीच्या माध्यमातून साकारण्यात येत असलेल्या भक्त निवासाच्या कामाची पाहणी डॉ. अतुल भोसले यांनी केली. दरम्यान, त्यांच्या अध्यक्षतेखाली २१ जुलै रोजी नूतन समिती सदस्यांची पहिलीच बैठक होणार आहे.